Muqdisho – Hawlgalka Midowga Afrika ee Taageerada iyo Xasilinta Soomaaliya (AUSSOM) ayaa 160 askari oo ka tirsan ciidanka Booliska Uganda ku maamuustey doorka muuqda ee ay ka qaateen nabadda iyo amniga Soomaaliya.
Saraakiishan oo ka kala socday guutada 12-aad ee Qaybta Booliska Uganda (UFPU-12), ayaa billado sharafyada Midowga Afrika ku guddoomay munaasabad aad u qurux badan oo uu guddoominayay ku-simaha Madaxa AUSSOM, Sivuyile Bam.
Taliyaha Booliska AUSSOM, Kaaliyaha Kormeeraha Guud ee Booliska (AIGP) Hillary Sao Kanu, iyo mas’uuliyiin kale ayaa ka qaybgaley munaasabadda ka dhacday Xarunta Dhexe ee ciidamada AUSSOM ee magaalada Muqdisho.
“Bandhigan billadaha lagu bixiyay wuxuu caddayn u yahay adkeysigiinna, u heellanaantiinna, iyo naf-hurnimada aad ku muujiseen dagaalka lagula jiro Al-Shabaab iyo hawlgalka ballaaran ee nabad-dhisidda ee waafaqsan hawlgalka Midowga Afrika,” ayuu yiri Md. Bam oo khudbad u jeedinaya saraakiisha soo dhammeystay waajibaadkooda shaqo.
“In kasta oo ay jiraan xaalado adag iyo khataro badan, waxaad muujiseen go’aan aan leexleexad lahayn waxaadna si adag ugu istaagteen dhibaatada. Geesinimadiinna iyo xirfadlenimadiinna kaliya gacan kama geysan soo celinta sharciga iyo kala dambeynta balse waxay sidoo kale xoojisay kalsoonida iyo aaminaadda shacabka Soomaaliyeed,” ayuu hadalkiisa ku daray Md. Bam, isagoo ku ammaanay Dowladda Uganda sida ay uga go’an tahay nabadda iyo xasilloonida ku soo dabaalidda gobolka.
Guutada ciidanka UFPU-12, ee Soomaaliya la keenay Abriil 2024, iyagoo hoos imaanaya Hawlgalka Ku-meel-gaarka ah ee Midowga Afrika ee Soomaaliya (ATMIS), ayaa si weyn gacan uga geystay guulaha howlgalka Midowga Afrika iyaga oo hawlgallada ka taageerayay Ciidanka Booliska Soomaaliyeed.
“Socdaalkii ciidamada UFPU-12 ee Soomaaliya wuxuu ahaa mid leh adkaysi, dishibiliin, iyo u heellanta waajibaadkooda. Sanadihii la soo dhaafay, waxaad la kulanteen caqabado hawleed mug leh, haddana waxaad muujisay geesinimo iyo go’aan gaar ah oo aad ku gudanayseen hawlahiinna. Hadday noqdaan roondooyin halis ah, ilaalinta xarumaha muhiimka ah, dadaallada hawlaha booliska bulshada, ama tayaynta Ciidanka Booliska Soomaaliyeed (CBS), kaalintiinu waxay ahayd mid qiimo leh,” ayay tiri AIGP Kanu, oo ku ammaantay saraakiisha hawlkarnimada iyo naf-hurnimada ay muujiyeen.
“Ku guuleysiga fulinta hawlgallada wadajirka ah ee Ciidanka Booliska Soomaaliyeed, kaalmadiinna ku aaddan taageeridda hannaanka doorashada, iyo sida ay idinkaaga go’aneyd ilaalinta xuquuqul insaanka ayaa si weyn gacan uga geystay guusha AUSSOM.”
Taliyaha Guutada UFPU-12, Taliye Justus Asiimwe, ayaa ku ammaanay saraakiisha sida dhow ee ay ula shaqeeyeen Qaybta Booliska Nayjeeriya iyo ciidamada Uganda ee ku sugan xerada ay wadaagaan ee Muqdisho.
“Waxaan had iyo jeer qaddarin doonnaa waaya-aragnimada iyo xiriirka aan yeellaney ee aan beeranay. Ma jiraan laba kooxood oo isu fahmi kara si ka fiican sida annaga iyo Nayjeeriya isu fahannay,” ayuu yiri Taliye Asiimwe.
Mas’uuliyiintii kale ee sarsare ee ka soo qeybgashay waxaa ka mid ahaa Isuduwaha Tababarka ee Booliska AUSSOM, Taliye Ku-xigeenka Booliska (ACP) Samuel Asiedu Okanta, Ku simaha Isuduwaha FPU iyo Hawlgallada Booliska AUSSOM, ACP Richard Evans Onyait, Isuduwaha Waaxda Dib-u-dhiska iyo Dib-u-habeynta Booliska Booliska AUSSOM (RR&D), ACP John Simon iyo Taliye Ku Xigeenka Ciidanka Uganda ee Soomaaliya, Gaashaanle Christoper Tumwine Columbus.
Unugyada Booliska AUSSOM (FPUs) waxay taageero hawlgaleed siiyaan Ciidanka Booliska Soomaaliyeed (CBS), oo ay ku jiraan gelbinta iyo ilaalinta VIP-da, sugidda amniga munaasabadaha heerka sare ah, la-talinta iyo tababarka, iyo sugidda amniga xarumaha muhiimka ah ee dawladda.
Waddamada kale ee Ciidamado Boolis ah ku deeqay AUSSOM, ee wehliya Uganda, waxaa ka mid ah Ghana, Nigeria iyo Sierra Leone.
