Muqdisho, 16-ka Maarso 2025 – Hawlgalka Midowga Afrika ee Taageerada iyo Xasilinta Soomaaliya (AUSSOM) ayaa ku biiray Ciidamada Booliska Soomaaliyeed (CBS) si ay roondooyin joogto ah ugu sameeyaan magaalada Muqdisho, si sare loogu qaado amniga inta lagu guda jiro bisha barakeysan ee Ramadaan.
Iyada oo qayb ka ah iskaashiga amni ee ay leeyihiin, ayaa Booliska AUSSOM iyo Ciidanka Booliska Soomaaliyeed waxaa ay sameeyeen hawlgallo joojin iyo baaris ah waxayna baro kantaroolo guurguura dhigeen magaalada Muqdisho maalintii Axada si ay uga hortagaan falal dambiyeedyada dhici kara.
Roondooyinka iyo bar kantaroollada ayaa laga sameeyay goobo kala duwan oo ku yaalla bartamaha magaalada Muqdisho iyo xaafadaha, sida Warta Nabadda, Boondheere, Heliwaa iyo Kaaraan.
Xidigle Bashiir Xuseen, oo ah Sarkaalka Xiriirka Booliska Gobolka Banaadir, ayaa bogaadiyay xiriirkooda wada shaqeyn ee ay leeyihiin ee wax badan ka beddelay amniga Magaalada.
“Iyadoo ay tahay bishii barakaysan ee Ramadaan, waxaa jira khataro badan oo dhanka ammaanka ah, waana sababta aan u kordhineyno booliska magaalada. Waxaan rabnaa in aan muujino xiriirka dhow ee wada shaqeynta ee aan la leenahay saaxiibadayada caalamiga ah,” ayuu yiri Xidigle Bashiir, oo unugiisa qaabilsan la socoshada hawlgallda bar koontaroollada guurguur ee magaalada Muqdisho.
Madaxa Hawlgelinta Booliska AUSSOM, Kormeeraha Guud ee Booliska (SP) Dennis Okhuelegbe, ayaa sheegay in hawlgallada wadajirka ah ay ujeeddadoodu tahay in kor loogu qaado muuqaalka booliska iyo amniga guud ee Muqdisho inta lagu jiro bisha Ramadaan.
“Marka booliska la arko, dembiilayaasha iyo qof kasta oo damacsan in uu dembi galo ayaa laga hortagi doonaa. Joogitaankayaga iyo amniga la xoojiyay, qof ujeeddo dembi leh iskuma dayi doonno in uu fuliyo qorsheyaashiisa xun,” ayuu yiri.
Kormeeraha Guud ee Booliska (SP) Okhuelegbe ayaa bogaadiyay wada-shaqeynta xooggan ee ka dhexeysa shacabka iyo booliska, isagoo xusay in hawlgallada wadajirka ah ay yihiin tallaabo muhiim u ah dadaalka booliska AUSSOM ay ugu wareejinayaan mas’uuliyadda amniga ciidamada ammaanka Soomaaliya.
Qaraarka Golaha Ammaanka ee Qaramada Midoobay (UNSCR) ee tirsigiisu yahay 2767 (2024), ayaa faraya AUSSOM in ay ka taageerto booliska Soomaaliya maareynta nidaamka guud, ilaalinta bulshada iyo ilaalinta amniga gudaha.
